बातमी24तास, (वृत्त सेवा )चाकण औद्योगिक वसाहतीतील महाळुंगे पोलीस ठाण्याच्या हद्दीत असलेल्या कैलास स्टील कंपनीच्या मालकावर दुचाकी वरून आलेल्या दोन अज्ञात हल्लेखोरांनी गोळीबार केला. ही घटना आज सोमवारी (दि. २०) सकाळी घडली. आरोपी हेल्मेट घालून दुचाकीवरून आले होते. घटनास्थळी फायरिंग केल्यानंतर आरोपींनी वराळे ते भांबोली या दिशेने पलायन केले आहे.उद्योजकांवर झालेल्या गोळीबाराची दखल वरिष्ठ पोलीस अधिकाऱ्यांनी घेतली असून त्यांनी घटनास्थळी धाव घेतली आहे. वरिष्ठ पोलीस अधिकाऱ्यांनी सर्व हद्दीत नाकाबंदी लावण्याचे आदेश दिले आहेत. पोलीस नियंत्रण कक्षालाही याबाबत कळविण्यात आले आहे. पुणे शहर आणि पुणे ग्रामीण पोलिसांनाही या गोळीबाराबाबत कळविण्यात आले आहे.खेड आणि शिक्रापूर परिसरातही नाकाबंदी करण्याचे निर्देश देण्यात आले आहेत. गोळीबार व्यावसायिक वादातून झाला की अन्य कारणावरून झाला याबाबतचे नेमके कारण आणि आरोपींची ओळख पटवण्यासाठी पोलीस तपास सुरू आहे. पोलिसांकडून आसपासच्या परिसरातील सीसीटीव्ही फुटेजची पाहणी केली जात आहे. पुढील तपास चालू आहे.