बातमी24तास,ऑनलाईन न्यूज पोर्टल
(क्राईम रिपोर्टर) लोणावळा परिसरात पर्यटना साठी आलेल्या पर्यटकांच्या चारचाकी वाहनांच्या काचा फोडून चोऱ्या करणाऱ्या आरोपीच्या लोणावळा ग्रामीण पोलिसांनी अवघ्या तीन तासात मुसक्या आवळल्या असून आरोपीस अटक केली आहे.
याबाबत अधिक माहिती अशी की,लोणावळा परीसरात जुने पुणे मुंबई हायवे रोडवरील तसेच मळवली, कार्ला भाजे परीसरात पर्यटक मोठ्या प्रमाणात पर्यटनासाठी येत असतात. शनिवार दिनांक 19/08/2023 रोजी भाजे व मनशक्ती केंद्र वरसोली परीसरामध्ये पर्यटनासाठी येणाऱ्या पर्यटकांच्या चारचाकी वाहनांच्या काचा फोडून गाडीतील मौल्यवान बॅगांमधील रोख रक्कम, मोबाईल इतर मौल्यवान वस्तु इत्यादी कोणीतरी अज्ञात चोरटा चोरून नेत असल्याबाबत लोणावळा ग्रामीण पोलीस स्टेशनला दोन तक्रारदार तक्रार देण्यास आले असता त्यांच्याकडून उपयुक्त माहिती घेवून त्यानुसार सहा. पोलीस अधीक्षक सत्यसाई कार्तीक व पोलीस निरीक्षक किशोर धुमाळ यांच्या मार्गदर्शनाखाली पोलीस उपनिरीक्षक भारत भोसले, पोलीस हवालदार नितेश कवडे व पोलीस नाईक गणेश होळकर यांचे पथक रवाना झाले.
या पथकाने वरील घटनेच्या अनुषंगाने आरोपीचा व गाडीचा शोध घेण्यासाठी प्रथम मनशक्ती केंद्र वरसोली येथे घडलेल्या घटनेच्या ठिकाणचे सीसीटीव्ही फुटेजची तपासणी केली असता सदर फुटेजमध्ये इनोव्हा सदृष्य कारमधील 30 ते 35 वयाचा अंगात चॉकलेटी रंगाचा टी शर्ट घातलेला अनोळखी इसम हा चारचाकी गाडीची काच फोडून चोरी करताना आढळल्याने पोलीसांनी सदर संशयीत इनोव्हा कारचा वरसोली, कार्ला, मळवली, भाजे व लोहगड परिसरात शोध घेण्यास सुरुवात केली. त्यावेळी काळ्या काचा असणारी टोयोटा कंपनीची इनोव्हा कार नं. GJ 06 FC 3806 ही भाजे धबधबा नं. 2 परीसरात संशयीत रित्या फिरत असताना मिळून आल्याने पोलीसांनी कार चालकाकडे विचारपूस केली असता त्याने त्याचे नाव अखिल सलीम व्होरा वय 32 वर्षे रा. नुतन नगर अमिना मंजील जवळ, आनंद, (गुजरात) असे सांगीतले. पोलीसांनी सदर कारची झडती घेतली असता या कार चालकाकडे इनोव्हा गाडीमध्ये सीमकार्ड नसलेले एकुण 6 मोबाईल, तसेच 5 पर्स, 2 बॅगा, 2 पॉवर बँक, 2 घड्याळे, 22,900/- रोख रक्कम व इनोव्हा कार असा एकुण 12,11,100/- रुपये असा मुद्देमाल मिळुन आला. त्याबाबत पोलीसांनी त्याच्या कडे अधिक चौकशी केली असता सदर माल व रोख रक्कम ही काही गाड्यांच्या काचा फोडून चोरी केली असल्याचे त्याने कबूली दिल्याने त्यास पुढील चौकशीसाठी पोलीस स्टेशन येथे आणले. सदर चोरीच्या घटनेबाबत लोणावळा ग्रामीण पोलीस स्टेशन येथे गु.र.नं. 350/2023 भादवि 379,427 व गु.र.नं. 351/2023 भादवि 379,427 असे गुन्हे दाखल झाले असुन सदर आरोपीकडून जप्त केलेल्या वस्तुंमध्ये सदर दोन्ही गुन्ह्यातील तक्रारदार यांच्या वस्तु मिळुन आलेल्या आहेत.
